Se l'é 'l giorno de Boteghe,

ferma el treno a la stassion,
vegni fora de carossa
quant te rive a Dossobon.
 
Cori caro, su pedala,
metti forza nei sgarleti
nel cortile de le scole
gh'é na fila de bancheti!
 
Qua se vende tanta merce
de pregiata qualità,
no strafanti o strasseossi:
roba bona, a bon marcà.
 
Vuto fiori, vuto fruti,
vuto pan par i to denti?
Qua gh'é tutto, par ti stesso
e par mile to parenti.
 
Guarda là quel materasso,
guarda qua le paparele,
sula destra gh'é le radio,
a sinistra le lanele.
 
La to dona vol profumo?
El to omo un bicerin?
Fora i bessi, bona gente,
tutto qua l'é soprani!
 
I fioleti vol le scarpe,
vol la suocera 'l capèl,
en sto logo benedetto
tutto calza de penèl.
 
Le dal nono na carriola
vol el vispo buteleto,
dal moroso la morosa
un slusente bracialeto,
 
un ricamo vol la sposa
un bel quadro so mari,
nel cortile de le scope
tutti quanti, su, vegni!
 
No parlemo de vestiti:
ghe n'é mille e più segnati,
par le femene, pai masci,
par i bocce pena nati.
 
Ela pronta la fameja, 
acomprar l'apartamento?
Qua l'è 'l logo: zo na firma,
te gh'é casa 'n momento.
 
Gh'é ci tien dei gusti fini:
parrucchiere par signora,
pransi pieni de sorprese,
viagi longhi a la malora:
 
tutto pensa i venditori,
dai sugatoli al giornàl,
a le carte colorate
pai presepi de Nadàl.
 
Ci no ferma o ci no compra
en Boteghe a Dossobòn
o l'è sensa na palanca
o l'è proprio un gran…